Italia miraton marrëveshjen me Shqipërinë — 12 pakte për sigurinë dhe mbrojtjen
Dokumenti i nënshkruar në Romë përfshin gjashtë marrëveshje dhe gjashtë memorandume në fusha si siguria, shëndetësia dhe menaxhimi i migracionit.
ROMË — Dhoma e Deputetëve e Parlamentit italian ka miratuar projektligjin për ratifikimin e Marrëveshjes së Bashkëpunimit Strategjik ndërmjet Italisë dhe Shqipërisë, e cila u nënshkrua në Romë më 13 nëntor 2025. Lajmi u bë i ditur përmes një njoftimi zyrtar nga ambasada shqiptare në Itali në platformën sociale X.
Ky dokument i rëndësishëm përfshin gjashtë marrëveshje dhe gjashtë memorandume për bashkëpunim në fusha të ndryshme jetike. Ndër to veçohen sektorët e mbrojtjes, sigurisë dhe shëndetësisë, por marrëveshja shtrihet edhe në energji, mbrojtjen e mjedisit, drejtësi, menaxhimin e migracionit, infrastrukturë, bujqësi, turizëm, arsim dhe inovacion.
Përveç koordinimit në këto fusha, ky akt synon të forcojë më tej partneritetin strategjik mes dy vendeve dhe të mbështesë integrimin europian të Shqipërisë. Gjithashtu, marrëveshja e ratifikuar parashikon edhe mbështetje specifike për diasporën shqiptare që jeton dhe punon në shtetin italian.
Burim: Shqiptarja
— Redaksia ZHURMA