Çfarë zbuluan bisedat mes Jovanovëve dhe zyrtarëve shtetërorë?

KOÇAN — Ekspertiza e telefonave e paraqitur sot në gjykatë zbuloi bisedat e të pandehurit kryesor Dejan Jovanov dhe djalit të tij, Mihajllo Jovanov, me përfaqësues të institucioneve shtetërore dhe punonjës të tyre. Komunikimet mes tyre vazhduan rreth pesë vjet, nga 2020 deri në momentin e zjarrit tragjik në 2025.

Nga një pjesë e komunikimit mes Jovanovëve shihej se Mihajllo e njoftonte babanë për një bastisje — vizitën e zyrtarëve policorë në diskotekë për të kontrolluar praninë e të miturve. Dejan Jovanov iu përgjigj: "Në rregull, le të jenë të pranishëm, ka shumë të mitur, ne gjithsesi do ta çojmë kompaninë në falimentim."

U prezantua edhe komunikimi lidhur me njoftimin paraprak për një kontroll nga inspektorët e Drejtorisë së të Ardhurave Publike (DAP) në diskotekë. Pikërisht këta inspektorë janë aktualisht nën hetim në Koçan, ndonëse ndaj tyre ende nuk është ngritur aktakuzë.

Për zjarrin në "Pulse" janë akuzuar 35 persona fizikë dhe tre persona juridikë. Ndër ta janë pronari i diskotekës, persona të afërta me të, inspektorë të institucioneve shtetërore, ish-ministra, si dhe pjesëtarë e pronari i agjencisë së sigurisë që mbulonte lokalin. Të gjithë janë deklaruar të pafajshëm dhe kanë kundërshtuar lidhjen shkak-pasojë mes veprimeve të tyre dhe zjarrit.

Zjarri në diskotekën "Pulse" shpërtheu më 16 mars 2025, gjatë një performancë të grupit DNK, dhe konsiderohet një nga tragjeditë më të rënda në historinë e re të vendit.

Seanca e sotme vazhdoi procedurën e provave me dëgjimin e dëshmitarëve të propozuar nga Prokuroria, e cila përfaqësohet nga një ekip prej 15 prokurorë publikë.

Burim: Portalb
— Redaksia ZHURMA