Çfarë premtoi Hyseni fermerëve në hapjen e sezonit të korrjeve?
Në 75 hektarë tokë me grurë e misër në fshatin Zhegër, kryetari i Gjilanit premtoi subvencione dhe lehtësime të vazhdueshme për fermerët.
GJILAN — Kryetari i Komunës së Gjilanit, Alban Hyseni, premtoi se institucionet komunale do të vazhdojnë t'i mbështesin fermerët me subvencione dhe lehtësime "për çdo hap", teksa vizitoi bujqit e fshatit Zhegër në ditën e hapjes së fushatës së korrje-shirjeve.
I shoqëruar nga ushtruesi i detyrës së drejtorit të Bujqësisë, Driton Sylejmani, Hyseni u njoh me punimet në terren dhe bisedoi me bujqit për sfidat dhe nevojat e tyre. Ai vizitoi sipërfaqe të konsiderueshme të mbjella me kultura bujqësore.
"Patëm kënaqësinë të takonim Alfonsin, me të cilin biseduam nga afër për punët e mëdha që po bëhen në këto 75 hektarë tokë të mbjella me grurë e misër", tha Hyseni, duke shtuar se kaloi "një ditë të shkëlqyer në terren me bujqit tanë punëtorë".
"Sfidat e tyre janë edhe tonat, prandaj përkushtimi ynë mbetet maksimal", deklaroi kryetari i Gjilanit. Ai u uroi fermerëve "korrje të mbarë dhe plot bereqet" në sezonin që sapo nisi.
Fushata e korrje-shirjeve pritet të vazhdojë gjatë javëve në vijim në të gjitha zonat bujqësore të Komunës së Gjilanit, sipas njoftimit të komunës.
Burim: Ekonomia Online
— Redaksia ZHURMA