Çfarë kundërshtoi opozita në ligjet për arsimin e lartë?

SHKUP — Komisioni parlamentar për Arsim, Shkencë dhe Sport filloi leximin e parë të paketës së ligjeve për arsimin e lartë me tensione të menjëhershme. Deputetët e opozitës shqiptare kërkuan shtyrjen e mbledhjes për javën e ardhshme, kërkesë që shumica e anëtarëve të këtij komisioni nuk e miratoi. Punimet u ndërprenë dy herë para se të vazhdohej procesi.

Opozita akuzoi shumicën parlamentare se shkel procedurat ligjore. Deputetja e Frontit Evropian, Rina Ajdari, tha për Alsat se njoftimi për mbledhjen ishte dërguar vetëm një ditë më parë, ndonëse Rregullorja parasheh afat prej pesë ditësh pune, procedurë që sipas saj pamundëson pjesëmarrjen efektive të opozitës.

Ajdari kritikoi edhe faktin se deputetët e opozitës u detyruan të merrnin pjesë njëkohësisht në disa komisione parlamentare. Ajo akuzoi shumicën se me qëllim përcaktoi këto afate për t'i shpërqendruar kundërshtarët dhe për ta kaluar ligjin me patjetër, pa u dëgjuar plotësisht.

Zëvendësministri i Arsimit, Driton Sulejmani, theksoi se pakoja e ligjeve duhet miratuar për të rritur cilësinë e arsimit të lartë dhe standardet akademike. Ai tha se ligjet do të sjellin përfitime konkrete për studentë dhe institucionet e arsimit të lartë.

Sipas Sulejmanit, studentët më të mirë do të zgjidhen nëpër fakultete dhe do ta kenë mundësinë të punësohen menjëherë në institucionet e arsimit të lartë. Universitetet që do të performojnë më mirë do të kenë mundësinë të marrin më shumë mjete financiare.

Qeveria e Maqedonisë së Veriut miratoi versionin final të paketës më 22 prill. Pakoja përfshin tri ligje: Ligjin për arsimin e lartë, Ligjin për cilësinë në arsimin e lartë dhe Ligjin për aktivitetin kërkimor shkencor. Projektligjin për arsimin e lartë e prezantoi ministrja Janevska më 6 shkurt të këtij viti.

Disa nga ndryshimet e propozuara kanë shkaktuar reagime në komunitetin akademik dhe në partitë politike të opozitës, disa prej të cilave kanë kërkuar tërheqjen e ligjit të ri. Lidhja Social Demokrate e sheh ligjin si të dëmshëm për sistemin e arsimit të lartë, ndërsa Sindikata e Pavarur Akademike paralajmëroi dëme të pariparueshme.

Burim: Portalb, Alsat-M
— Redaksia ZHURMA