Çfarë kërkon mbrojtja e Veselit përpara aktgjykimit?

HAGA — Mbrojtja e Kadri Veselit ka kërkuar lirimin e tij nga paraburgimi deri në deklarimin e vendimit, pasi shpallja e aktgjykimit për krerët e UÇK-së u shtye për më 16 shtator. Avokatët argumentojnë se rrethanat kanë ndryshuar ndjeshëm pasi procesi gjyqësor u mbyll plotësisht dhe nuk arsyetohet më vazhdimi i paraburgimit.

Avokati i Veselit, Rodney Dixon, shkruan se vazhdimi i paraburgimit përbën cenim të drejtës për liri dhe gjykim brenda afati të arsyeshëm sipas Konventës Evropiane për të Drejtat e Njeriut. "Zgjatja aktuale e ndryshon rrënjësisht këtë vlerësim dhe dëmton drejtpërdrejt të drejtën e z. Veseli për liri sipas Nenit 5(1) dhe të drejtën e tij për gjykim brenda një afati të arsyeshëm sipas Nenit 5(3) të Konventës Evropiane për të Drejtat e Njeriut," shkruan Dixon.

Sipas Dixon, vazhdimi i paraburgimit do të nënkuptonte edhe 7 muaj në mbyllje pasi procesi është mbyllur, duke e çuar gjithsej paraburgimin drejt pothuajse 6 vjetësh. Për avokatët, kjo situatë kërkon rivlerësim nëse paraburgimi i vazhdueshëm mbetet i nevojshëm dhe proporcional në rrethana kaq të jashtëzakonshme.

Mbrojtja thekson se të gjithë dëshmitarët e drejtpërdrejtë janë dëgjuar dhe të gjitha kërkesat për pranimin e provave me shkrim janë vendosur, ndërsa çështja e Prokurorisë është plotësisht e mbyllur. Çdo mundësi për ndërhyrje në proces është ulur ndjeshëm, argumenton mbrojtja, dhe çdo rrezik i mbetur mund të menaxhohet përmes kushteve të duhura të lirimit.

Mbrojtja thekson se Veseli e ka dëshmuar tashmë aftësinë e tij për t'u përmbajtur kushteve të rrepta të lirimit në tri raste kur iu mundësua lirim për arsye humanitare. Sipas avokatëve, tribunale të tjera penale ndërkombëtare, në rrethana të ngjashme procedurale, e kanë rishqyrtuar nevojën e paraburgimit të vazhdueshëm.

Burim: Vox Kosova
— Redaksia ZHURMA