Cattin Hennin: Rëndësia e diasporës dhe infermierëve në Zvicër

Ambasadorja e Zvicrës në Kosovë, Anne-Lise Cattin Hennin, ka theksuar rëndësinë e diasporës dhe bashkëpunimit mes dy shteteve gjatë Konferencës së Parë Ndërkombëtare për Cilësinë e Shërbimeve Shëndetësore, ku morën pjesë edhe drejtues të Lidhjes së Infermierëve Shqiptarë në Zvicër. Ngjarja u organizua nën moton «Investojmë në cilësi – Ndërtojmë besim» për të përmirësuar cilësinë e shërbimeve shëndetësore dhe për të forcuar bashkëpunimin profesional ndërmjet Zvicrës dhe Kosovës, duke mbledhur profesionistë dhe përfaqësues institucionalë.

Gjatë kësaj konference ndërkombëtare, delegacioni i Lidhjes së Infermierëve Shqiptarë në Zvicër zhvilloi takime me personalitete të larta të shtetit, përfshirë presidenten e Kosovës, Justina Shiroka Pula, si dhe zëvendëskryeministren e dytë dhe ministre e Drejtësisë, Donika Gërvalla-Schwarz. Përfaqësuesit e organizatës u takuan gjithashtu me ministrin e Shëndetësisë, Arben Vitia, me të cilin diskutuan mundësitë e bashkëpunimit, ndërsa ministri Vitia i ftoi ata që bisedimet t'i vazhdonin në një takim zyrtar.

Delegacioni i LISZ-së përbëhet nga Yllka Zuzaku-Mustafa si presidente e organizatës, Ilir Hoti në cilësinë e nënkryetarit dhe udhëheqësit të strategjisë e bashkëpunimeve, si dhe Xheneta Zuzaku si udhëheqëse e arsimit dhe zhvillimit profesional. Sipas përfaqësuesve të organizatës, ata u pritën edhe nga kryetarja e Odës së Infermierëve të Kosovës, Nexhmije Gori, e cila shprehu mbështetjen për zhvillimin e bashkëpunimit profesional. Gjatë aktivitetit, ata biseduan edhe me Fetije Huruglicën, ish-shefe e Divizionit të Infermierisë në Ministrinë e Shëndetësisë, rreth rëndësisë dhe zhvillimit të profesionit të infermierisë.

Organizata vlerësoi lart angazhimin e Lulzim Gashit, udhëheqës i Divizionit për Infermieri në SHSKUK, i cili shoqëroi delegacionin gjatë qëndrimit dhe ndihmoi në realizimin e kontakteve me përfaqësues institucionalë. Po ashtu, u shpreh mirënjohje për Bardh Ahmetin, shef i kabinetit të ministrit të Shëndetësisë, për ftesën, mikpritjen dhe mundësinë e krijimit të kontakteve të reja profesionale. Ambasadorja Cattin Hennin deklaroi se bashkëpunimi nuk realizohet vetëm në nivel shtetëror, por edhe përmes lidhjeve të drejtpërdrejta mes njerëzve.

«Jam shumë e kënaqur që, edhe pse ndodhem këtu vetëm prej një ore e gjysmë, tashmë kam takuar tre bashkëqytetarë zviceranë nga diaspora, të cilët kanë ardhur këtu për të zhvilluar bashkëpunime», u shpreh ambasadorja zvicerane duke iu referuar drejtuesve të LISZ-së. Përfaqësuesit e pranishëm theksuan se angazhimi i tyre vullnetar synon ndërtimin e urave të bashkëpunimit, shkëmbimin e njohurive dhe përvojave, si dhe kontributin në përmirësimin e kujdesit shëndetësor.