Si u kthye në teatër rrëfimi romantik i Byronit për Shqipërinë?

LONDËR — Shqipëria u rrëfye përsëri para publikut britanik të hënën mbrëma, në skenën e "Shaw Theatre", përmes produksionit etno-muzikor "Shqipëria përmes syve të Byronit". Shkrimtari dhe aktori britanik Robert Wilton, që jeton prej dy dekadash në Kosovë, interpretoi vetë poetin Lord Byron, duke rikrijuar udhëtimin e tij në trojet shqiptare të shekullit XIX.

Shfaqja u frymëzua nga "Shtegtimet e Çajld Haroldit" (Kënga II), vepra ku Byroni përjetësoi mbresat nga udhëtimi i tij në Shqipëri. Ajo ndërthur teatrin, muzikën dhe folklorin, duke e kthyer poezinë e tij në një përvojë skenike të gjallë për publikun e Londrës.

Wilton, i lindur më 22 shkurt 1973, jeton prej afro dy dekadash në Kosovë, ku ka përvetësuar gjuhën shqipe në nivel të lartë. Ai ka shërbyer si këshilltar i kryeministrit të Kosovës dhe si zëvendësambasador në Misionin e OSBE-së në Kosovë.

Përveç diplomacisë, Wilton është autor romanesh historike: libri i tij i parë, "Kontrolluesi i përgjithshëm", u vlerësua me çmimin e Shoqatës së Shkrimtarëve Historikë, ndërsa së fundmi botoi romanin "Helmim në Paris". Në rolin e Byronit, ai bashkoi përvojën letrare me njohjen e historisë shqiptare dhe lidhjen e tij të gjatë me Kosovën.

Momenti më domethënës i mbrëmjes ishte pjesëmarrja e Ansamblit Kombëtar të Këngëve dhe Valleve Popullore të Shqipërisë, që u ngjit në skenën e Londrës për herë të parë që nga rënia e regjimit komunist. Sipas organizatorëve, ngjarja ka peshë jo vetëm artistike, por edhe institucionale e kulturore.

Shfaqja u organizua nga "Empowered Women of Diaspora", në partneritet me "British Albanian Youth & Culture". Forumi i shkrimtarëve "Forum 26" e vlerësoi produksionin si urë kulturore midis Shqipërisë dhe Mbretërisë së Bashkuar, ku letërsia, historia, muzika dhe identiteti kombëtar bashkohen përmes figurës së pavdekshme të Lord Byronit.

Interpretimi i Wiltonit solli në skenë edhe rolin e gruas shqiptare si shtyllë e familjes dhe identitetit kombëtar, siç e përshkruan njoftimi i organizatorëve. "Shaw Theatre" njihet për atmosferën intime dhe akustikën e mirë, në një sallë me 446 ulëse që u hap më 1971 dhe mori emrin e sotëm më 1998.

Burim: Koha.net
— Redaksia ZHURMA