Kush është Blanco, ylli italian që vjen në Sunny Hill Festival?
Këngëtari që përfaqësoi Italinë në Eurovision 2022 me këngën 'Brividi' do të performojë në Prishtinë nga 31 korriku deri më 2 gusht.
PRISHTINË — Këngëtari italian Blanco do të jetë pjesë e listës së finalizuar të artistëve që do të performojnë në edicionin e sivjetëm të Sunny Hill Festival, i cili do të mbahet nga 31 korriku deri më 2 gusht.
Blanco njihet si një nga artistët më të suksesshëm të muzikës italiane, me transmetime që kapin qindra milione në Spotify. Ai mbeti i shënuar për përfaqësimin e Italisë në Eurovision Song Contest në vitin 2022, ku së bashku me Mahmood këndoi hitin "Brividi", si dhe për këngë të tjera të njohura si "Ricordi" dhe "Mi fai impazzire".
Këtë vit festivali sjell emra të mëdhenj globalë si headliners, duke përfshirë Katy Perry, Lewis Capaldi dhe Martin Garrix, si dhe emra të muzikës elektronike si Seth Troxler dhe Adam Port. Krahas yjeve ndërkombëtarë, në skenë do të jenë edhe emra të spikatur të muzikës vendore, ndërsa biletat janë tashmë në shitje përmes faqes zyrtare.
Burim: Nacionale
— Redaksia ZHURMA