Berisha: Paratë e gjetura në vilë janë para xhepi të Ballukut

Kryetari i Partisë Demokratike, Sali Berisha, deklaroi se shuma e kartëmonedhave të fotografuara në një kuti të kuqe, e cila sipas materialeve hetimore të SPAK-ut dyshohet se ndodhet në vilën e lidhur me ish-zëvendëskryeministren Belinda Balluku në Dhërmi, përbën vetëm «para xhepi» të saj.

Publikimi i materialit hetimor u bë i ditur pasi në media rrodhi një fotografi nga dosja e SPAK-ut. Fotografia ishte pjesë e një mesazhi të dërguar në aplikacionin WhatsApp nga një punonjëse e ish-zëvendëskryeministres, ku shfaqej arka e kuqe me kartëmonedha euro brenda një vile në kompleksin turistik «White Rocks» në Dhërmi. Gjatë një bashkëbisedimi me qytetarët, Sabjan Maho ngriti pyetje lidhur me mënyrën se si po vepron drejtësia për këtë rast dhe pse kjo foto u publikua në media.

Gjatë deklaratës për mediat dhe me qytetarët, Berisha pretendoi se një rast i ngjashëm ka ndodhur edhe me ministrin dhe deputetin Arbjan Mazniku. Berisha tha se Maznikut i janë gjetur 900 mijë euro në shtëpi pas një denoncimi nga të afërm të tij, por sipas kryetarit të PD-së, në procesverbalin e kontrollit janë shënuar vetëm 3 mijë euro. Berisha njoftoi se kjo ngjarje nuk e pengoi Maznikun të bëhet ministër apo deputet. Gjithashtu, kreu i opozitës hodhi akuza direkte ndaj SPAK-ut, duke e cilësuar atë si një krijesë të Partisë Socialiste dhe duke pretenduar se prokuroria vepron në mënyrë selektive ndaj zyrtarëve të mazhorancës pasi kryeministri Edi Rama e ka pranuar publikisht rolin e partisë në krijimin e këtij institucioni.

Lidhur me rrjedhën e mëtejshme të hetimit, Berisha deklaroi se mbetet për t'u parë se si do të regjistrohet shuma e parave të gjetura në vilën e Dhërmiut gjatë inventarizimit zyrtar nga SPAK-u, duke ngritur dyshime nëse prokuroria do të shënojë 1 milion apo 5 mijë euro në dokumente.

Sali Berisha deklaroi se «kutia me euro e Lubisë, në vilën e kuqe të saj, se edhe ajo ka vilë të kuqe, janë paratë e xhepit të kësaj lubie të vërtetë. Qofshin dhe miliona, janë paratë e xhepit të saj. Nuk ka pasur Shqipëria një racë të shpifur në pushtet si këta hajdutë». Ai shtoi se «SPAK-u është i partisë, zotëri. E ka thënë vetë Edi Rama. Një gjë u them, është gabim të mos u besohet diktatorëve pohimet e tyre. Ai e ka thënë: SPAK-u është krijesë e Partisë Socialiste. Kur ka thënë që SPAK-u është krijesë e Partisë Socialiste, duhet të kuptosh që SPAK-u është i zhytur në krime po aq sa eksponentë të Partisë Socialiste dhe janë seleksionuar mbi bazën e krimit».