Pse Bekim Haxhiu po kërkon rinumërim të votave të PDK-së?
Kandidati i PDK-së i ka parashtruar ankesë PZAP-it pas gjetjes së pasaktësive në numërimin e votave nga KQZ, duke kërkuar verifikim të plotë.
PRISHTINË — Bekim Haxhiu nga Partia Demokratike e Kosovës i është drejtuar zyrtarisht Panelit Zgjedhor për Ankesa dhe Parashtresa (PZAP). Ai po kërkon një rinumërim të plotë të votave për të gjithë kandidatët e PDK-së, duke pretenduar se procesi fillestar ka pasur gabime.
Sipas Haxhiut, kjo kërkesë bazohet në gjetjet konkrete nga rinumërimet e deritashme të Komisionit Qendror të Zgjedhjeve (KQZ). Ai thekson se rinumërimi i 185 vendvotimeve, që përfshijnë rreth 3,52 për qind të votave të partisë, dëshmoi se numërimi fillestar ka pasur pasaktësi.
Nga ky verifikim, Haxhiut i janë shtuar gjashtë vota që nuk ishin regjistruar më parë. Ai argumenton se kur diferenca ndërmjet kandidatëve është vetëm 102 vota, çdo votë ka rëndësi të jashtëzakonshme dhe mund të ndikojë drejtpërdrejt në ndarjen përfundimtare të mandateve.
Për këtë arsye, Haxhiu po kërkon ndërhyrjen e PZAP-it për të verifikuar të gjitha votat e kandidatëve që nuk janë përfshirë ende në këtë proces, duke synuar mbrojtjen e plotë të integritetit zgjedhor dhe votës së qytetarëve.
Burim: Insajderi
— Redaksia ZHURMA