Pse sundimi i ligjit mbetet pengesa kryesore për integrimin e Kosovës në BE?
Prezantimi i pyetësorit rajonal për drejtësi tregon se gjyqësori dhe sundimi i ligjit lidhen drejtpërdrejt me fillimin e negociatave për anëtarësim.
PRISHTINË — Në prezantimin e pyetësorit rajonal për drejtësi, të financuar nga Bashkimi Evropian dhe të realizuar nga Banka Botërore në bashkëpunim me Ipsos Kosova, u theksua se sistemet funksionale të sundimit të ligjit në Ballkanin Perëndimor dhe roli i të dhënave janë thelbësorë për matjen e progresit në sektorin e drejtësisë.
Pyetësori ka analizuar të dhëna të bazuara në përvojat e tri grupeve kryesore: qytetarëve dhe bizneseve si shfrytëzues të shërbimeve të drejtësisë, gjyqtarëve dhe prokurorëve si ofrues, si dhe avokatëve si ndërmjetësues. "Jemi duke analizuar me kujdes të madh informatat e mbledhura prej këtij pyetësori sepse kjo flet për nivelin e kënaqshmërisë, efikasitetin, barazinë dhe pavarësinë e gjyqësorit", u tha gjatë prezantimit.
U vu në dukje rëndësia e vlerës krahasuese rajonale për të parë pozitën e Kosovës në raport me vendet e tjera të Ballkanit Perëndimor, si dhe krahasimi me të dhënat e vitit 2020 për të matur zhvillimet. Komisioni Evropian i shfrytëzon këto informata për të matur progresin e reformës dhe për të informuar angazhimin e mëtejshëm.
Përveç pyetësorit, në vlerësim përdoren misionet e shqyrtimit të rasteve, monitorimi i gjykimeve në rastet e korrupsionit të nivelit të lartë dhe krimit të organizuar, si dhe raportet rajonale të progresit. Sipas prezantimit, "objektivat afatmesme të Kosovës që të fillojnë negociatat për anëtarësim lidhen drejtpërdrejt me gjyqësorin dhe sundimin e ligjit".
Në fund u shpreh pritja për formimin e institucioneve pas zgjedhjeve dhe vazhdimin e reformave. "Shpresojmë që ky proces të udhëhiqet nga fryma e kompromisit në mënyrë që shumë shpejt Kosova të ketë institucione, të cilat mund të përparojnë reformat e domosdoshme", u tha në përfundim.
Burim: Zëri
— Redaksia ZHURMA