Çfarë do të financojë BE-ja me 206 milionë euro për Kosovën?
Fondet do të shpërndahen në infrastrukturë, energji, mjedisi dhe migrim, sipas Komisionit Evropian
Bashkimi Evropian ka miratuar një paketë financiare në vlerë prej 206.4 milionë eurosh për Kosovën në kuadër të programeve IPA 2026 dhe IPA 2027. Fondet do të shpërndahen në disa fusha prioritare, duke përfshirë projekte në sektorë kyç për zhvillimin e vendit.
Sipas autoriteteve, investimi më i madh, 44 milionë euro, do të drejtohet për projekte që lidhen me mjedisin dhe ndryshimet klimatike, ndërsa 34.5 milionë euro janë planifikuar për sektorin e energjisë. Një shumë prej 30.5 milionë eurosh do të përdoret për menaxhimin e kufijve dhe migrimin.
Ndërkohë, 31.8 milionë euro do të mbështesin rritjen e konkurrueshmërisë, zhvillimin e arsimit dhe krijimin e mundësive për punësim. Për forcimin e qeverisjes së mirë dhe harmonizimin me standardet e Bashkimit Evropian janë ndarë 24.7 milionë euro, ndërsa 15 milionë euro do të investohen në avancimin e sundimit të ligjit.
Burim: Gazeta Metro, https://gazetametro.net/be-miraton-mbi-206-milione-euro-per-kosoven-fokus-te-infrastruktura-energjia-dhe-mjedisi/ — Redaksia ZHURMA