Stuhia ndërpret koncertin e Bad Bunny në Milano — evakuohen 80 mijë spektatorë

— Koncerti i këngëtarit portorikan Bad Bunny në Milano u ndërpre papritur të shtunën në mbrëmje, pasi një stuhi e fuqishme me breshër goditi hipodromin La Maura, duke detyruar evakuimin e rreth 80 mijë spektatorëve.

Reshjet intensive, era e fortë dhe vetëtimat krijuan momente paniku mes publikut. Sipas raportimeve, disa persona pësuan lëndime të lehta në kokë nga copat e mëdha të breshërit, ndërsa të tjerë morën ndihmën e parë në vendngjarje.

Bad Bunny, emri i vërtetë i të cilit është Benito Antonio Martínez Ocasio, u detyrua ta ndërpriste performancën gjatë këngës së shtatë. Përmes sistemit të zërit, organizatorët u kërkuan të gjithë të pranishmëve të largoheshin menjëherë nga ambientet e koncertit për arsye sigurie.

Sipas organizatorëve, procesi i evakuimit zgjati rreth 50 minuta. Pas konsultimeve me autoritetet lokale, LiveNation Italy njoftoi se koncerti u anulua përfundimisht, nuk do të ricaktohet dhe të gjitha biletat do të rimbursohen. Drejtori i LiveNation Italy, Roberto De Luca, e cilësoi situatën si një nga ngjarjet më të pazakonta në karrierën e tij 45-vjeçare, duke falënderuar stafin e sigurisë dhe publikun për reagimin e qetë gjatë emergjencës.

Ngjarja ndodh në një periudhë kur moti ekstrem po prek disa vende të Evropës, me stuhi të forta në veri të Italisë dhe zjarre të mëdha në Spanjë e Francë, duke shkaktuar ndërprerje të aktiviteteve dhe evakuime në zona të ndryshme.

Burim: KultPlus, https://kultplus.com/stuhi-e-forte-me-bresher-nderpret-koncertin-e-bad-bunny-ne-milano-evakuohen-80-mije-spektatore/

— Redaksia ZHURMA