Pse UNESCO-ja bllokon lidhjen me Shqipërinë, por jo ndërtimet ilegale në Ohër?
ASH akuzon VLEN-in se nuk vendos dhe nuk konsultohet për infrastrukturë, ndërkohë që aplikon standard të dyfishtë politik me argumentin e UNESCO-s.
SHKUP — Aleanca për Shqiptarët (ASH) hedh poshtë pretendimet e zëvendësministres së Transportit nga VLEN, duke theksuar se ajo "nuk ka as bazë politike, as institucionale" të lavdërohet me Koridorin 8. Sipas ASH-së, VLEN-i "nuk pyetet dhe nuk konsultohet" për vendimet e qeverisë në projekte të mëdha infrastrukturore.
ASH ngre tri pyetje konkrete: kur do të përfundojë Koridori 8, pse janë shkurtuar mjetet buxhetore për vitin 2026, dhe pse segmenti jetik që lidh vendin me Shqipërinë nuk duhet të kalojë përmes Strugës. Qytetarëve, thekson ASH, "nuk u intereson propaganda ditore, por duan përgjigje konkrete."
Standardi i dyfishtë bëhet evident me argumentin e UNESCO-s: VLEN-i e citon si pengesë të patejkalueshme për lidhjen me Shqipërinë, por e shpërfill kur bëhet fjalë për mijëra ndërtime pa leje dhe qindra vendime rrënimi të pazbatuara në Ohër, vendlindjen e Aleksandër Nikollovskit. "Kjo nuk është çështje teknike, por standard i dyfishtë politik", thuhet në deklaratën e ASH-së.
Burim: Telegrafi
— Redaksia ZHURMA