Çfarë zbuloi Artan Hoxha brenda burgut të Peqinit?

TIRANË — Gazetari Artan Hoxha ka publikuar pamje video nga brenda një qelie të burgut të sigurisë së lartë në Peqin, duke shfaqur një ambient që e cilësoi si “hotel 7 yje”, me pajisje të plota dhe tavan gipsi.

Në pamjet e siguruara, qelia shfaqet e pajisur me televizor, ambiente gatimi dhe dollapë të integruar, si dhe një tavan të zbukuruar me gips, krejt ndryshe nga kushtet e zakonshme të burgimit në Shqipëri.

I ftuar në Euronews të premten, Hoxha tha se kishte parë investime të bëra nga personazhe të botës së krimit nëpër burgje, por kurrë në këtë nivel, duke e krahasuar me një suitë hoteli dhe duke e quajtur të pabesueshme.

Sipas gazetarit, qelia në fjalë i përket një personazhi shumë të rëndësishëm të botës së krimit, të narkotrafikut dhe lojërave të fatit. Kjo video vjen pasi drejtori i Përgjithshëm i Burgjeve, Adriatik Kupi, njoftoi kontrolle të vazhdueshme dhe sekuestroi telefona e televizorë në qelitë e institucionit.

'Protestuesve që bërtasin "Rama në burg, Berisha në burg" u them ta shohin këtë video, sepse hotele nuk ka rastisur të ketë të këtij niveli,' tha Hoxha ndër të tjera. Zbulimi i tij ngre pikëpyetje serioze mbi mbikëqyrjen dhe barazinë para ligjit në sistemin e vuajtjes së dënimit në Shqipëri.

Burim: Tetova Sot
— Redaksia ZHURMA