Arrestohet drejtuesi teknik pas vdekjes së minatorit në Bulqizë
40-vjeçari Ilir Kolaveri humbi jetën më 1 gusht; 63-vjeçari P. K. dyshohet se s'i zbatoi rregullat e mbrojtjes në punë.
BULQIZË — Policia e Bulqizës ka arrestuar drejtuesin teknik të subjektit minerar ku më 1 gusht humbi jetën 40-vjeçari Ilir Kolaveri. Në pranga është vënë shtetasi P. K., 63 vjeç, banues në fshatin Vajkal, Bulqizë, i cili ushtronte detyrën e drejtuesit teknik në minierën e kromit.
Arrestimi u krye pas veprimeve hetimore të zhvilluara për ngjarjen e 1 gushtit, kur Kolaveri humbi jetën në minierën e kromit. Sipas Policisë, nga hetimet paraprake dyshohet se 63-vjeçari, në cilësinë e drejtuesit teknik, nuk ka zbatuar rregullat e mbrojtjes në punë, çka dyshohet se solli aksidentin fatal. Për pasojë është aksidentuar me vdekje shtetasi I. K., 40 vjeç.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprën penale "Shkelja e rregullave të mbrojtjes në punë".
Burim: Gazeta Tema
— Redaksia ZHURMA
