Arbër Zeneli: 'Nuk mund të ankohem pse jam në stol'
Kontribuoi me një gol dhe një asistim në fitoren 1-2 të Elfsborgut
STOKHOLM — Arbër Zeneli ka reaguar pas paraqitjes së shkëlqyer në fitoren e skuadrës së tij ndaj Malmos, ku kontribuoi me një gol dhe një asistim. Ylli i Kosovës u la në stol dy sfidat paraprake, por e dëshmoi menjëherë kualitetin për të shpërthyer ndaj Malmos.
Zeneli pranoi se është normale që çdo futbollist të ndihet i zhgënjyer kur nuk luan, por theksoi se ka zgjedhur ta tregojë vlerën e tij në fushë dhe jo me ankesa. "Të gjithë lojtarët nervozohen kur nuk luajnë, por jam profesionist në mënyrën time dhe provoj ta ndihmoj skuadrën kur vij", deklaroi Zeneli.
Paraqitja me gol dhe asistim ndaj Malmos mund të jetë një pikë kthese për Zenelin, i cili shpreson të fitojë më shumë minuta në vazhdim të sezonit me paraqitjet e tij bindëse. "A kemi biseduar? Sigurisht që po. Por ndonjëherë nuk duhet të flasësh. Ai e zgjedh formacionin bazë që mendon se është më i miri dhe thjesht duhet ta pranosh. Nuk mund të sillem duke u ankuar dhe të shfaqem para ekipit se jam i zemëruar që nuk luaj", përfundoi reprezentuesi i Kosovës.
Burim: Telegrafi — Redaksia ZHURMA