Aplikacioni "Qytet i Sigurt" në funksion për automjetet me targa të huaja

Ministria e Punëve të Brendshme njofton opinionin se është vënë në funksion ueb-aplikacioni me interfejs për pajisjet mobile "Qytet i Sigurt", i cili në këtë fazë u dedikohet shtetasve të huaj, përkatësisht pronarëve dhe shoferëve të automjeteve me targa të huaja.

Përmes aplikacionit, shtetasit e huaj do të mund të marrin në mënyrë të thjeshtë dhe të drejtpërdrejtë informacione për kundërvajtjet rrugore të evidentuara me sistemin "Qytet i Sigurt", të kenë qasje në urdhërpagesat e dhëna për kundërvajtje, si dhe t'i paguajnë gjobat në mënyrë elektronike.

Gjatë hyrjes në aplikacion, shoferi duhet të fotografojë ose të skanojë dokumentin e tij të udhëtimit dhe të vendosë targën e regjistrimit të automjetit ose të automjeteve të cilat ai i përdor në vend.

Në këtë mënyrë, shoferët e huaj, automjetet e të cilëve do të evidentohen se kanë kryer kundërvajtje rrugore në territorin e të gjithë vendit, do të mund të informohen në kohë dhe në mënyrë të thjeshtë, si dhe të rregullojnë detyrimin e tyre, pa pasur nevojë për ndalime apo vonesa plotësuese në pikat kufitare.

Nga MPB theksojnë se vazhdojnë me avancimin e shërbimeve digjitale, ndërsa në fazat e ardhshme parashihet zgjerimi i funksionaliteteve edhe për kategoritë e tjera të përdoruesve.

Burimet: Zhurnal.mk; Alsat-M (klaster 2 outlets).