Ambasada britanike: Sulmet ndaj gazetarëve të hetohen

Në kuadër të Ditës Ndërkombëtare për t'i Dhënë Fund Pandëshkueshmërisë për Krimet ndaj Gazetarëve, Ambasada e Britanisë së Madhe në Kosovë ka theksuar se Mbretëria e Bashkuar qëndron përkrah punonjësve të medias si në vend ashtu edhe në mbarë botën. Sipas përfaqësisë diplomatike, gazetarët nuk duhet të përballen me dhunë, ngacmime apo kërcënime për shkak të ushtrimit të profesionit të tyre.

Në reagimin e lëshuar për medie thuhet se çdo kërcënim dhe sulm ndaj gazetarëve kërkon hetim të menjëhershëm, ndërsa autorët duhet të dalin para drejtësisë. Për më tepër, theksohet nevoja që gazetarët të veprojnë të lirë për të hetuar, raportuar dhe kërkuar llogaridhënie nga pushteti pa pasur frikë, ndërsa lufta ndaj pandëshkueshmërisë cilësohet si element thelbësor për mbrojtjen e lirisë së medias dhe sigurimin e informimit të pavarur për publikun.