Aksident kokë më kokë në aksin Vorë-Fushë-Krujë, dyshohet për një viktimë
Përplasja e dy automjeteve në zonën e Urës së Gjolës ka lënë të plagosur rëndë dy drejtuesit, ndërsa njëri prej tyre dyshohet se ka ndërruar jetë rrugës për në spital.
KRUJË — Dy automjete janë përplasur kokë më kokë në aksin rrugor Vorë-Fushë Krujë, konkretisht pranë zonës së Urës së Gjolës. Sipas informacioneve paraprake, një mjet tip “Benz” që lëvizte nga Rinasi drejt Fushë-Krujës, drejtuar nga një person nga Korça, ka kryer një parakalim të gabuar. Kjo ka sjellë përplasjen e fortë me një automjet tjetër “Land Rover” që po udhëtonte nga veriu në drejtim të jugut.
Si pasojë e këtij incidenti rrugor, drejtuesit e të dyja automjeteve kanë pësuar dëmtime të rënda trupore. Njëri nga drejtuesit dyshohet se ka humbur jetën gjatë transferimit drejt Spitalit të Traumës, ndërsa personi tjetër po dërgohet gjithashtu drejt të njëjtit spital për ndihmë mjekësore.