Ahmeti e quan antishqiptar ligjin për përfaqësim të drejtë
Gashi: Nuk planifikojmë ta miratojmë fshehurazi, ligji pritet të sillet në vjeshtë
SHKUP — Propozimi ligjor për përfaqësim të drejtë është antishqiptar, thotë kryetari i BDI-së, Ali Ahmeti. Ai në një intervistë theksoi se draft-ligji i dërguar nga Qeveria në Kuvend nuk i përfaqëson drejt shqiptarët në institucionet publike. Shtoi se deputetët e Frontit Evropian nuk do ta votojnë këtë version dhe paralajmëroi ndërhyrje me amendamente.
“Ligjet që propozohen janë antishqiptare dhe janë kundër Marrëveshjes së Ohrit. Ligji për arsim është ligj kundër arsimimit të shqiptarëve të arsimit të lartë. Ligji për përfaqësim të drejtë është kundër shqiptarëve, nuk parashihet as etnia e as sanksionet për ata që nuk e zbatojnë parimin e përfaqësimit të drejtë. Është flluskë sapuni, mbetet në vullnetin e palës shumicë, sikurse në të kaluarën. Na duhen për dekor shqiptarët!”, tha Ahmeti.
Edhe pse draft-ligji ka kohë që është miratuar në Qeveri, vazhdon të mbetet në sirtarët e Kuvendit. Pas vendosjes në rend dite në seancë plenare, u largua nga Kryetari i Kuvendit, Afrim Gashi. Ai tha se ligji mund të ketë mangësi, por është më mirë të ketë ligj sesa të mos ketë fare. “Do ta shfrytëzoj të drejtën time për të vlerësuar se kur është momenti më i përshtatshëm që ky ligj të hidhet në votim. Qytetarët dhe opozita le ta dinë se nuk planifikojmë ta miratojmë fshehurazi. Seanca do të thirret, të gjijë deputetët do të ftohen dhe vendimin do ta marrë seanca plenare”, u shpreh Gashi.
Duke qenë se Kuvendi shkon në pushim veror, propozimi pritet të sillet në vjeshtë. Më herët opozita shqiptare e akuzoi Gashin se po e mban peng ligjin, duke pritur një moment kur opozita nuk është e pranishme. Sipas VLEN, ky ligj do të zëvendësojë mekanizmin e balancuesit, tashmë të shfuqizuar, dhe pasi drafti ka kaluar edhe mendimin e Komisionit të Venecias, pritet të marrë epilog përfundimtar me miratimin në Kuvend.
Burim: TV21
— Redaksia ZHURMA