AGK do t'u ofrojë ndihmë psikologjike falas gazetarëve në Kosovë

Asociacioni i Gazetarëve të Kosovës (AGK) do të ofrojë ndihmë psikologjike falas për anëtarët e saj, në bashkëpunim me OSBE-në dhe partnerë të tjerë. Kryetari i AGK-së, Xhemajl Rexha, theksoi rëndësinë e trajtimit të shëndetit mendor të gazetarëve që përballen me stres, punë përtej orarit dhe rreziqe gjatë raportimeve në Kosovë.

Sipas Rexhës, çështja e shëndetit mendor të gazetarëve është adresuar përmes konferencave dhe diskutimeve gjatë këtij viti dhe vitit të kaluar. Ai sqaroi se stresi i madh, puna pa orar dhe mbingarkesa emocionale e mendore ndikojnë drejtpërdrejt në mirëqenien e punonjësve të medias. Kur gazetarët heqin dorë nga profesioni për shkak të këtyre ngarkesave, dëmtohet liria e medias dhe e drejta e publikut për t'u informuar.

Rexha ka kujtuar se të gjitha ekipet e gazetarëve, përfshirë gazetaret gra, kameramanët dhe shoferët, kanë qenë të ekspozuara ndaj rreziqeve gjatë trazirave në veriun e Kosovës në vitin 2023, si dhe gjatë protestave në Prishtinë ku u përdor gaz lotsjellës. Ai vuri në dukje se statusi ekonomik e financiar i shumë gazetarëve, sidomos të rinjve, nuk u mundëson atyre të kërkojnë vetë ndihmë profesionale. Nisma e AGK-së synon të largojë stigmën dhe t'u mundësojë anëtarëve konsultime falas me psikologë, ndërsa gjatë vitit 2025 janë shënuar mbi 60 raste të sulmeve ndaj gazetarëve.

Angazhimi i organizatës do të vazhdojë gjatë javëve dhe muajve në vazhdim për të përcaktuar mënyrën e saktë të ofrimit të kësaj ndihme psikologjike falas për anëtarët e AGK-së.

«Asociacioni i Gazetarëve të Kosovës këtë vit, por edhe vitin e kaluar, ka trajtuar me disa konferenca, me disa diskutime, shëndetin mendor të gazetarëve. Është një prej temave shumë të rëndësishme. Gazetarët në Kosovë përballen me situata të ndryshme. Kemi parë protestat e muajit shtator për dorëzimin e gazit lotsjellës, stresin e madh, punën e gazetarëve pa orar, përtej orarit. Është një punë që kërkon shumë përkushtim dhe që ndikon edhe në mirëqenien e gazetarëve. Prandaj, është e nevojshme, nxisim gazetarët që të kërkojnë ndihmë profesionale, në mënyrë që ta bëjnë punën e tyre. Kur gazetarët lodhen dhe disa prej tyre heqin dorë nga ky profesion për shkak të mbingarkesës emocionale e mendore, atëherë ndikohet drejtpërdrejt liria e medias, ndikohet e drejta e publikut për të qenë i informuar. Kështu që, ne do të vazhdojmë, në bashkëpunim me OSBE-në edhe me partnerë të tjerë, edhe në javët e muajt në vazhdim, që të shohim mënyrën se si t’u ofrojmë kolegëve tanë, anëtarëve të AGK-së, ndihmë psikologjike falas, në mënyrë që ata të ballafaqohen me problemet që ua sjell profesioni, i cili, e dimë që prej fillimit kur e zgjedhin, është shumë i sfidueshëm», deklaroi Rexha.