Çfarë synon Agjenda e re e Drejtave të Fëmijëve 2027-2030?

TIRANË — Me nismën e Ministres së Shëndetësisë dhe Mirëqenies Sociale, Evis Sala, Këshilli Kombëtar për të Drejtat dhe Mbrojtjen e Fëmijëve do të zhvillojë mbledhjet e tij periodike nëpër shkolla të qyteteve të ndryshme, duke përfshirë drejtpërdrejt në diskutime nxënës të arsimit parauniversitar dhe gjimnazistë.

Takimi i parë jashtë institucionit u zhvillua në gjimnazin "Petro Nini Luarasi", ku ministrja Sala bashkëbisedoi me nxënës, mësues dhe anëtarë të Këshillit mbi prioritetet e Agjendës Kombëtare të të Drejtave të Fëmijëve 2027–2030, duke theksuar rëndësinë e dëgjimit të zërit të fëmijëve dhe të rinjve në hartimin e politikave që i prekin ata.

"Fëmijët nuk janë thjesht përfitues të politikave tona, por janë qytetarë me të drejta të plota, me zë, me mendime dhe me potencial që duhet mbështetur e fuqizuar. Për këtë arsye, çdo politikë dhe çdo vendimmarrje duhet të vendosë interesin më të lartë të fëmijës në qendër", u shpreh ministrja Sala.

Agjenda e re do të fokusohet në tre drejtime kryesore: forcimi i sistemit të mbrojtjes së fëmijëve, eliminimi i çdo forme dhune dhe shfrytëzimi ndaj tyre, dhe promovimi i mirëqenies e mundësive të barabarta. Sipas ministres, agjenda do të adresojë gjithashtu sigurinë digjitale, përfshirjen sociale dhe mbështetjen për fëmijët në situata vulnerabël.

Ministrja nënvizoi se forcimi i mbështetjes për familjen — si mjedisi më i mirë për rritjen e fëmijës — mbetet prioritet i periudhës në vijim, përmes zgjerimit të shërbimeve komunitare dhe kujdesit alternativ familjar. Gjatë diskutimeve, nxënësit dhe anëtarët e Këshillit ndanë propozime, mes tyre edhe përfshirja e fëmijëve të diasporës.

Burim: ATSH
— Redaksia ZHURMA