Abazoviq më i pëlqyeri në Mal të Zi: Çfarë mbështetje gëzojnë partitë?
Ish-kryeministri shqiptar kryeson listën e popullaritetit me +37%, ndërsa lëvizja e tij URA renditet e katërta në sondazhin e fundit.
PODGORICË — Ish-kryeministri shqiptar i Malit të Zi, Dritan Abazoviq, gëzon mbështetjen më të lartë neto mes politikanëve në vend, sipas një sondazhi të opinionit publik të realizuar në javën e parë të qershorit 2026. Rezultatet e publikuara nga portali “24kroz7” e vendosin liderin e Lëvizjes URA në krye me një rejting neto pozitiv prej +37 për qind.
Abazoviqi pasohet nga kryeministri Milojko Spajiq i Lëvizjes Evropa Tani (PES) me +25 për qind dhe Milan Knezheviq me +14 për qind. Ndërsa ish-presidenti Milo Gjukanoviq gëzon +12 për qind mbështetje, i ndjekur nga Boris Mugosha me +10 për qind dhe Danijel Zhivkoviq me +5 për qind.
Kur bëhet fjalë për partitë politike, Partia Demokratike e Socialistëve (DPS) vazhdon të jetë forca më e madhe në vend me 23,6 për qind mbështetje. Ajo pasohet nga Lëvizja Evropa Tani (PES) me 15,1 për qind dhe Nova Srpska Demokratija (NSD) me 9,3 për qind të preferencave të qytetarëve.
Lëvizja URA e Abazoviqit renditet e katërta me 8,1 për qind, e pasuar nga DNP me 7,8 për qind dhe Demokratët (DCG) me 5,5 për qind. Më pas renditen Aleanca Evropiane me 4,8 për qind dhe Partia Boshnjake (BS) me 3,9 për qind mbështetje.
Nën pragun zgjedhor mbeten SNP me 2 për qind dhe Preokret me 1,2 për qind. Ndërkohë, 18,7 për qind e të anketuarve kanë deklaruar se ende nuk kanë vendosur ose nuk kanë dashur të shprehen për preferencat e tyre politike.
Burim: Klan Kosova
— Redaksia ZHURMA