6 deputetë të rinj shqiptarë pritet t'i ketë Kuvendi i Kosovës
Pse ka kaq pak fytyra të reja në përfaqësimin politik shqiptar?
PRISHTINË — Komisioni Qendror i Zgjedhjeve ka numëruar rreth 80 për qind të votave të kandidatëve për deputetë, dhe sipas të dhënave të deritanishme vetëm 6 kandidatë nga partitë shqiptare do të sigurojnë ulëse për herë të parë në Kuvendin e ri.
Pjesa tjetër e përfaqësuesve do të jenë deputetë të legjislaturës së fundit apo të legjislaturave të mëhershme. Nga numërimi i deritashëm, deputetë të rinj nga LVV-ja pritet të jenë: Osman Musliu, Arton Konushevci, Armend Baloku, Krenare Çerkini dhe Valon Peci. I gjashti është nga PDK-ja, Adriatik Berisha.
Në Kuvend pritet të kthehen edhe disa ish-deputetë që në legjislaturën e fundit nuk siguruan ulëse. Nga PDK-ja këtë pritet ta bëjnë Kosovare Murseli, Jakup Nura, Altin Krasniqi, Fadil Demaku, Bekim Haxhiu dhe Hajdar Beqa. Përmes LDK-së në ulëse do të kthehet ish-presidentja Vjosa Osmani, që ishte bartëse e listës së kësaj partie. Përveç saj, pritet të kthehen Arben Gashi, Shkëmb Manaj e Paris Guri. Nga AAK-ja priten Ardian Gjini e Agim Çeku, por Gjini ka deklaruar se nuk do të jetë pjesë e Kuvendit.
Bazuar në rezultatet preliminare, LVV-ja do të ketë 48 deputetë, PDK-ja 24, LDK-ja 20 dhe AAK-ja 8. Nga katër partitë kryesore, 31 kandidate kanë siguruar ulëse pa ndihmën e kuotës gjinore — 17 gra nga LVV-ja, 6 nga PDK-ja, 7 nga LDK-ja dhe 1 nga AAK-ja. Kandidati më i votuar është Albin Kurti me mbi 180 mijë vota, i dyti Glauk Konjufca me mbi 140 mijë, i treti Bedri Hamza me mbi 90 mijë. Kurti siguroi 82 për qind të votave të përgjithshme të partisë, Gjini 81 për qind, Hamza 80 për qind, Osmani 68 për qind, ndërsa lideri i LDK-së Lumir Abdixhiku 61 për qind.
KQZ-ja ende nuk ka filluar me numërimin e votave të diasporës, që janë në proces verifikimi.
Burim: Koha.net, https://www.koha.net/zgjedhjet-2026/vec-6-deputete-te-rinj-shqiptare-pritet-ti-kete-kuvendi
— Redaksia ZHURMA