37-vjeçari në Pejë tenton ta kapë për fyti nënën 75-vjeçare
Motivi ishte kërkesa e tij për ndarjen e shtëpisë; prokuroria e liroi pas marrjes në pyetje, por rasti penal vazhdon.
PEJË — Policia arrestoi një burrë 37-vjeçar (E.K.) të dyshuar se tentoi ta kapë për fyti nënën e tij 75-vjeçare (Gj.H.), pas një mosmarrëveshjeje për ndarjen e pronës familjare në rrugën "Mbreti Bardhyl". Rasti u raportua si dhunë në familje dhe policia ndërhyri menjëherë në banesë.
Sipas deklaratës së nënës, konflikti nisi kur i dyshuari, pasi kishte biseduar gjatë ditës me disa avokatë, i kërkoi ndarjen e pjesës së tij të shtëpisë. Kur ajo i tha se shtëpia ishte e tij dhe nuk kishte nevojë për ndarje, ai dyshohet se tentoi ta kapë për fyti.
Viktima deklaroi se prej kohësh përballej me dhunë psikike të vazhdueshme nga djali, i cili sipas saj përdor substanca narkotike dhe alkool. Ajo refuzoi trajtim mjekësor, ndërsa Qendra për Punë Sociale, në koordinim me policinë, e strehoi në një shtëpi të sigurt.
I dyshuari u arrestua dhe u intervistua nga policia, por u lirua me vendim të Prokurorit të Shtetit në procedurë të rregullt. Ndaj tij është iniciuar rasti penal për "Dhunë në familje".
Burim: Sinjali
— Redaksia ZHURMA