300 kuota me kredi me zero interes për administratën publike

TIRANË — Qeveria miratoi për vitin 2026 një paketë të re prej 300 kuotash për kredi me zero interes për punonjësit e administratës publike, në kuadër të politikave për mbështetjen e strehimit të profesionistëve në sektorët kryesorë të shërbimeve publike. Drejtoresha e Drejtorisë së Strehimit, Dardana Grabovaj, bëri të ditur për ATSH-në se kuotat janë shpërndarë sipas nevojave të institucioneve kryesore.

Prej 300 kuotave, 70 janë dedikuar për Ministrinë e Brendshme, 70 për Ministrinë e Shëndetësisë dhe Mbrojtjes Sociale, 70 për Ministrinë e Arsimit, 70 për Ministrinë e Mbrojtjes dhe 20 për Ministrinë e Drejtësisë. Kategoria e punonjësve të Policisë së Burgjeve është veçuar në shpërndarjen drejt Ministrisë së Drejtësisë.

Përzgjedhja e përfituesve nuk bazohet vetëm në plotësimin e kushteve formale, por edhe në një sistem pikëzimi të përcaktuar në vendimin e qeverisë. Përparësi do të kenë punonjësit me kontratë pune me afat të pacaktuar, ndërsa vlerësohen edhe vitet e eksperiencës në administratë dhe kategoritë e pagës.

Procesi i aplikimit do të zhvillohet tërësisht në mënyrë elektronike përmes portalit "e-Albania", në bashkëpunim me AKSHI-n. Procedurat janë të thjeshta dhe kërkojnë vetëm dy dokumente: një vërtetim që aplikanti nuk zotëron pronë në Republikën e Shqipërisë dhe një vetëdeklarim se nuk ka pronë në proces legalizimi.

Ministria e Arsimit ka vendosur kritere shtesë prioritare për mësuesit. Përparësi japin mësuesit që janë çift dhe të dy ushtrojnë profesionin e mësuesit, si edhe atyre që udhëtojnë rreth 100 kilometra nga vendbanimi drejt vendit të punës, me qëllim lehtësimin e jetës së përditshme dhe qëndrueshmërinë në sistemin arsimor.

Fondi në total këtë vit, i vënë në dispozicion nga qeveria për mbulimin e interesave, llogaritet 28 milionë lekë. Drejtoresha Grabovaj sqaroi se programi është përmirësuar në krahasim me vitet e mëparshme, duke reflektuar nevojat specifike të sektorëve të ndryshëm të administratës publike. Komisionet e ngritura pranë çdo ministrie do të vlerësojnë aplikacionet sipas kritereve të përcaktuara.

Burim: ATSH
— Redaksia ZHURMA