19-vjeçari nga Skenderaj ndërton platformën që po lehtëson jetën e mijëra shoferëve

Ensar Gashi, programer nga Skenderaj dhe themelues i ANSR Tech, ka lansuar këto ditë platformën digjitale GjobatKS.com — një mjet kërkimi krejtësisht falas, i menduar për t’iu përgjigjur nevojës urgjente të shoferëve për informacion të shpejtë e të saktë.

Që nga hyrja në fuqi e ligjit të ri, shumë qytetarë janë përballur me dokumente zyrtare të gjata e komplekse, të vështira për t’u lexuar e kuptuar nga qytetari mesatar. Në vend që dikush të kalojë minuta të tëra duke kërkuar nëpër faqe PDF, Ensari krijoi një alternativë të shpejtë: mjafton të shkruash një fjalë të vetme — si “Semafori”, “Shpejtësia” apo “Rripi” — dhe platforma nxjerr menjëherë tri informacionet kyçe: gjobën financiare në euro, pikët negative, dhe masën mbrojtëse, përfshirë kohëzgjatjen e mundshme të marrjes së patentës.

Platforma është e ndarë në kategori të qarta, si shpejtësia, telefoni, alkooli, rripi i sigurisë dhe semafori, që mundësojnë kërkim të shpejtë për shkeljet më të shpeshta në trafik.

GjobatKS.com tashmë po qarkullon gjerësisht në rrjete sociale, ku qytetarët po e vlerësojnë si mjet praktik në një kohë kur qartësia rreth ligjit të ri mbetet e domosdoshme për shoferët e vendit.

Platforma është e qasshme falas në gjobatks.com