13-vjeçar vritet në Kumanovë pasi goditet me makinë

KUMANOVË — Agan Asani, 13 vjeç, ndërroi jetë më 28 maj, në orën 21:06, pasi u godit për vdekje me makinë në magjistralen Kumanovë-Shkup, në fshatin Çerkez. Fidan Salihi, 25 vjeç nga Kumanova, drejtonte automjetin që e goditi fëmijën ndërsa ky i fundit ishte me trotinet elektrik.

Raportimet policore tregojnë se Salihi dyshohet të ketë drejtuar makinën të paktën tre herë mbi shpejtësinë e lejuar. Në fshatin Çerkez, kufiri maksimal ishte 30 km/h; tabela të vendosura disa metra larg vendit të goditjes e konfirmonin këtë kufi.

Analizat e gjakut të Fidan Salihit kanë rezultuar pozitive për përdorimin e lëndëve narkotike. Departamenti për Ekspertiza Forenzike ka përfunduar raportin e tij, i cili është dorëzuar autoriteteve. Video-incizimi i aksidentit ekziston, por nuk u publikua për shkak të ndjeshmërisë së hetimit.

Policia po kompleton dokumentacionin e nevojshëm për të kallëzuar penalisht Fidan Salihin para Prokurorisë Themelore Publike. Sipas Ministrisë së Punëve të Brendshme, kallëzimi penal do të dorëzohet pas përfundimit të të gjitha provave materiale.

Burim: Alsat-M, Almakos
— Redaksia ZHURMA