10 organizata ndërkombëtare kërkojnë mbrojtje urgjente për gazetarët në Shqipëri

TIRANË — Dhjetë organizata ndërkombëtare që mbrojnë lirinë e medias kërkuan të mërkurën nga autoritetet shqiptare masa urgjente për mbrojtjen e gazetarëve dhe të hapësirës qytetare. Në një deklaratë të përbashkët, ato paralajmërojnë se zhvillimet e dy muajve të fundit kanë krijuar një klimë gjithnjë e më armiqësore ndaj raportimit të pavarur dhe debatit publik.

Reagimi vjen ndërsa gazetarët përballen me presion e vështirësi në mbulimin e protestave ditore që nisën dy muaj më parë si kundërshtim ndaj një projekti turistik në zonat e mbrojtura të Zvërnecit, i lidhur me dhëndrin e Donald Trumpit, dhe u zgjeruan më pas në protesta kundër qeverisë shqiptare.

Organizatat vërejnë se gazetarët janë përballur me pengesa, sulme dhe ndërhyrje të policisë gjatë raportimit. Përdorimi i ujit me presion dhe gazit lotsjellës për kontrollin e tubimeve, thonë ato, ka ngritur shqetësime për domosdoshmërinë, proporcionalitetin dhe mbrojtjen e gazetarëve e personave të tjerë të pranishëm.

Deklarata shpreh shqetësim edhe për procedurat penale të lidhura me protestat, që ngrenë dyshime për transparencën dhe procesin e rregullt ligjor. Organizatat shohin me shqetësim praktika intimidimi ndaj gazetarëve, aktivistëve dhe mbrojtësve të mjedisit, të cilët janë identifikuar publikisht, vënë në shënjestër dhe paraqitur si të paguar, të kontrolluar politikisht ose të drejtuar nga interesa të huaja.

Sipas Rrjetit SafeJournalists, të cituar në deklaratë, 15 nga 27 raste kërcënimesh dhe sulmesh ndaj gazetarëve të regjistruara në Shqipëri gjatë 2026-s ndodhën vetëm në qershor e korrik, periudhë që përkon me përshkallëzimin e protestave. Deklarata vjen pas një sërë reagimesh nga organizata shqiptare të medias, që kanë dënuar incidente ku gazetarë e operatorë televizivë u goditën ose u penguan.

Nënshkruesit kërkojnë që çdo akt dhune, kërcënimi apo pengimi ndaj gazetarëve të hetohet në mënyrë të pavarur, pavarësisht autorit, dhe u bëjnë thirrje autoriteteve të zbatojnë plotësisht Protokollin e Policisë së Shtetit për Sigurinë e Gazetarëve. Deklarata i drejtohet edhe Bashkimit Europian, Këshillit të Europës dhe OSBE-së, duke kërkuar që progresi i Shqipërisë drejt anëtarësimit në BE të vlerësohet edhe në bazë të lirisë së medias.

Burim: Reporter.al
— Redaksia ZHURMA