Zjarret në Shqipëri: 18 vatra, 9 aktive, Gojan-Gjegjan më problematike

Ministria e Mbrojtjes ka përditësuar bilancin e zjarreve në vend deri në orën 20:00, duke raportuar 18 vatra zjarri gjatë ditës, nga të cilat 9 mbeten aktive dhe 3 janë nën monitorim.

Vatra më problematike vijon të jetë ajo në Gojan-Gjegjan të Pukës, për shkak të terrenit të vështirë dhe erës së fortë. Forcat po punojnë për mbrojtjen e banesave, ndërsa banorët e zonës janë evakuuar. Ndërhyrja po kryhet nga toka dhe ajri, me 40 efektivë të Forcave të Armatosura dhe 3 helikopterë.

Në Mal Milot të Kurbinit, rreziku ndaj banesave është eliminuar, ndërsa ekipet po përpiqen ta vendosin plotësisht vatrën nën kontroll. Pas riaktivizimit të zjarrit në Malin e Dajtit, ndërhyrja po zhvillohet me forca tokësore dhe 1 helikopter të FA-së, pa rrezik për zonat e banuara.

Vatra në Gjon të Bulqizës mbetet aktive dhe po monitorohet nga 5 zjarrfikës, 22 vullnetarë dhe 4 forca bashkiake. Në Ballaxhiaj të Memaliajt, zjarri është vënë nën kontroll dhe ndodhet larg banesave. Situata është e përmirësuar edhe në Qafë Helmes dhe Lufaj të Mirditës, ku zjarret janë fikur ose izoluar.

Në operacionet në terren janë angazhuar 383 forca operacionale, 24 automjete zjarrfikëse, 90 efektivë të FA-së dhe 4 helikopterë të Forcës Ajrore. AKMC po koordinon dhe monitoron situatën në të gjithë territorin.