Zbulohet pllaka për 10 viktimat e aksidentit të vitit 2021 në Kroaci
Memoriali në Sllavonski Brod u realizua me mbështetjen e Ambasadës së Kosovës dhe u zbulua në prani të familjarëve e zyrtarëve nga të dy shtetet.
SLLAVONSKI BROD — Një pllakë përkujtimore është zbuluar në qytetin kroat të Sllavonski Brodit për të nderuar dhjetë viktimat që humbën jetën në aksidentin tragjik rrugor të 25 korrikut 2021. Ceremonia e organizuar nën përkujdesjen e Ambasadës së Kosovës mblodhi familjarë, qytetarë dhe përfaqësues të institucioneve shtetërore.
Në këtë ceremoni morën pjesë ambasadori Martin Berishaj, përfaqësuesi i Ministrisë së Punëve të Brendshme të Kosovës, Genc Metaj, si dhe zyrtarët lokalë kroatë Danijel Marušić e Martina Martić Puača. Realizimi i këtij projekti u mundësua me mbështetjen e veçantë të Adnan Vuniqit.
Ambasadori Martin Berishaj theksoi se vendosja e pllakës nuk është vetëm akt simbolik, por një shprehje e përgjegjësisë morale për të ruajtur kujtesën e viktimave. Ai rikujtoi se aksidenti i rëndë la dhjetë të vdekur, 15 të plagosur rëndë dhe rreth 30 të tjerë me lëndime.
Prefekti Danijel Marušić u shprehu solidaritet familjeve të viktimave, duke theksuar se asnjë fjalë nuk ua zbut dhimbjen, por ato nuk janë vetëm. Ai shtoi se kjo pllakë do të mbetet simbol i përhershëm kujtimi dhe thirrje që tragjedi të tilla të mos përsëriten.
Burim: Gazeta Dukagjini
— Redaksia ZHURMA