Veturat e reja në Zvicër do të vëzhgojnë çdo lëvizje të shoferit

BERNË — Nga 7 korriku i vitit 2026, të gjitha veturat e reja që do të shiten në Zvicër duhet të jenë të pajisura me një sistem të detyrueshëm kamerash për monitorimin e shoferit. Ky vendim vjen si rrjedhojë e harmonizimit të legjislacionit zviceran me rregulloren e re të Bashkimit Evropian për sigurinë rrugore, e njohur si GSR2.

Sistemi i quajtur Driver Monitoring System (DMS) përdor një kamerë me rreze infra të kuqe të pozicionuar direkt përballë shoferit për të analizuar çdo veprim. Kjo teknologji monitoron vazhdimisht drejtimin e shikimit të shoferit, lëvizjet e syve, frekuencën e pulitjes dhe shenjat fizike të lodhjes, përfshirë edhe gogësitjen gjatë vozitjes.

Në rast se sistemi zbulon se personi në timon është i shpërqendruar ose po e zë gjumi, ai do të lëshojë paralajmërime të menjëhershme vizuale dhe zanore. Përveç kësaj, paketa e re rrugore GSR2 integron edhe sinjalizuesit e frenimit emergjent, frenimin automatik dhe regjistruesit e të dhënave të aksidenteve.

Ndërsa prodhuesit e automjeteve argumentojnë se këto masa do të ulin ndjeshëm numrin e aksidenteve të shkaktuara nga pakujdesia, kritikët kanë shprehur rezerva të mëdha. Ata paralajmërojnë se makinat moderne po kthehen në mjete të mirëfillta të mbikëqyrjes masive, duke cenuar rëndë privatësinë e përdoruesve në rrugë.

Si masë shtesë, disa nga këto sisteme inteligjente do të kenë aftësinë të kufizojnë përdorimin e ekraneve multimediale nëse shoferi kalon kohë të tepërt duke naviguar nëpër meny.

Burim: Albinfo.ch
— Redaksia ZHURMA