Varrosen në Postribë Bleona Çelaj dhe dy fëmijët e saj të mitur
Hetuesit gjetën mbetjet e një bombole gazi në rrënojat e shtëpisë, ndërsa po verifikohen dëshmitë e familjarëve për konfliktet bashkëshortore.
POSTRIBË — Bleona Çelaj, 24 vjeçe, dhe dy fëmijët e saj të mitur, 1 dhe 3 vjeç, janë përcjellë sot për në banesën e fundit. Ata humbën jetën tragjikisht pas një zjarri që përfshiu shtëpinë e tyre në fshatin Domen, ndërsa trupat i janë nënshtruar ekzaminimeve mjeko-ligjore.
Në vendngjarje u gjetën mbetjet e një bombole gazi, që dyshohet si shkaktare e shpërthimit. Hetimet për vdekjen e nënës dhe fëmijëve në Postribë vijojnë, pasi nëna e viktimës ka dëshmuar se vajza kishte pasur marrëdhënie të tensionuara me bashkëshortin kohët e fundit.
Nga ana tjetër, bashkëshorti ka dëshmuar se ndodhej në qendër të fshatit Domen kur ra zjarri, rreth 20 minuta larg banesës në këmbë, për të blerë disa produkte për familjen. Policia po heton alibinë e tij, duke konfirmuar se shtëpia ndodhej në një zonë krejtësisht të izoluar.
Familja Çelaj jetonte në Gjermani dhe kishte ardhur në Shqipëri para pak ditësh për pushime. Mungesa e shtëpive të tjera pranë, terreni i vështirë malor dhe mungesa e një njoftimi të menjëhershëm ndikuan që zjarri të konstatohej me vonesë dhe të sillte pasojat tragjike për jetën e tyre.
Burim: Top Channel
— Redaksia ZHURMA