Kush po e thërret tubimin e miqësisë maqedono-ruse në Blatec?
Kisha Ortodokse Maqedonase është distancuar nga një thirrje anonime në rrjetet sociale për një tubim mbarëpopullor të paralajmëruar më 14 qershor.
BLATEC — Një thirrje anonime në rrjetet sociale u ka bërë thirrje qytetarëve të komunave të Vinicës dhe Koçanit për të marrë pjesë në një tubim mbarëpopullor kushtuar miqësisë maqedono-ruse. Ky aktivitet është paralajmëruar të mbahet më 14 qershor para kishës ortodokse ruse në fshatin Blatec.
Sipas njoftimeve, ky tubim synon të diskutojë për lidhjen ortodokse dhe të ardhmen e Maqedonisë, por organizatori i tij mbetet i panjohur. Pas përhapjes së këtij lajmi, ka reaguar menjëherë kleriku Dragan Arsovski, i cili njoftoi se ngjarja nuk mbështetet nga Kisha Ortodokse Maqedonase – Arqipeshkvia e Ohrit (KOM-AO).
Në reagimin e tij në Facebook, kleriku Arsovski sqaroi se ky tubim po organizohet pa dijeninë dhe bekimin e peshkopit kompetent. Ai theksoi se institucioni fetar distancohet plotësisht nga kjo ngjarje, duke shtuar se objekti në Blatec administrohet zyrtarisht nga Eparkia e Bregallnicës.
Për më tepër, prifti vuri në dukje se objekti i kishës ku planifikohet tubimi është ende në ndërtim e sipër dhe për këtë arsye nuk paraqet një vend të përshtatshëm për aktivitete të tilla. Ai ritheksoi se kisha është maqedonase dhe i përket besimtarëve vendas.
Nga selia qendrore e Kishës Ortodokse Maqedonase deklaruan shkurtimisht se nuk kanë dëgjuar për një thirrje të tillë. Sipas tyre, në të kaluarën nuk ka pasur raste të ngjashme të thirrjeve që ndërlidhen me ndonjë kishë ruse në vend.
Burim: Portalb
— Redaksia ZHURMA