Trump urdhëron flamujt në gjysmë shtizë për Dolly Parton
Presidenti amerikan Donald Trump urdhëroi uljen e flamujve në gjysmë shtizë për një javë, pas vdekjes së këngëtares legjendare Dolly Parton.
Presidenti amerikan, Donald Trump, ka urdhëruar që flamujt të valëviten në gjysmë shtizë në ndërtesat publike në të gjithë Shtetet e Bashkuara për një javë, si homazh për këngëtaren e muzikës country, Dolly Parton. Lajmi për vdekjen e saj në moshën 80-vjeçare u bë i ditur nga nipi i saj, Brian Seaver, në një video të ndarë në llogaritë e saj në mediat sociale.
Në një postim në rrjetin social Truth Social, Trump e cilësoi vdekjen e saj si një “humbje të vërtetë për miliona njerëz”, duke shkruar se “nuk ka pasur kurrë askënd si ajo dhe nuk do të ketë kurrë”. Ai njoftoi gjithashtu se flamujt do të ulen në gjysmë shtizë duke nisur nga ora 18:00 e mbrëmjes.
Dolly Parton ishte e njohur për hite të tilla si “9 To 5”, “I Will Always Love You” dhe “Jolene”. Në videon e tij, nipi i saj tha se “emri im është Brian Seaver, djali i Cassie Parton, dhe unë përfaqësoj familjen Parton dhe Owens sot duke njoftuar ndarjen nga jeta të tezes sime, Dolly Rebecca Parton Dean”. Ai shtoi se ky njoftim ishte diçka që Dolly ia kishte kërkuar vite më parë.