Trepça jep kontratë mbi gjysmë milioni euro për furnizim me eksploziv
Kush do t'i furnizojë me materiale shpërthyese minierat e Stantergut dhe Artanës?
MITROVICË — Trepça Sh.A. ka njoftuar dhënien e kontratës për furnizimin e minierave në Stanterg dhe Artanë me materialet e nevojshme shpërthyese për zhvillimin e aktiviteteve minerare. Pas përfundimit të një procedure të hapur të prokurimit, kontrata i është dhënë kompanisë "Ex Projekt" Sh.p.k. me vlerë të përgjithshme prej 589,777 eurosh.
Sipas njoftimit zyrtar, ky tender ka pasur si kriter për përzgjedhjen e fituesit çmimin më të ulët të ofruar, ku janë pranuar gjithsej dy oferta. Kontrata ka një afat zbatimi prej 12 muajsh, gjatë të cilëve kompania e përzgjedhur do të sigurojë materialet për operimet në miniera.
Sipas të dhënave zyrtare, kontrata është dhënë më 11 qershor 2026, ndërsa nënshkrimi i saj ndërmjet palëve pritet të bëhet më 16 qershor. Kjo marrëveshje do të sigurojë që minierat e Trepçës të kenë mjetet e nevojshme për aktivitetin e tyre minerar.
Burim: IndeksOnline
— Redaksia ZHURMA