Importi prek 652 milionë euro, toka bujqësore mbetet e papunuar
Pse po bie interesimi i fermerëve kosovarë për të punuar tokën?
PRISHTINË — Në Kosovë po vazhdon rritja e varësisë nga importi i produkteve ushqimore, ndërsa një pjesë e tokës bujqësore mbetet e papunuar dhe e pashfrytëzuar. Vetëm gjatë muajit mars, qytetarët kanë blerë produkte në vlerë prej 652 milionë euro, çka shënon një rritje prej 18% më shumë krahasuar me vitin e kaluar.
Në anën tjetër, prodhuesit vendorë kanë realizuar shitje prej vetëm 88 milionë euro. Ekspertët thonë se interesimi i përgjithshëm për bujqësi po shënon rënie dhe se fermerët sot po përballen me sfida të shumta, përfshirë mungesën e punëtorëve si dhe pasigurinë e vazhdueshme në treg.
Sipas tyre, ndarja e parcelave dhe ndërtimet e shumta në tokë bujqësore po e përkeqësojnë situatën në vend. Ekspertët paralajmërojnë se këto probleme po e rrezikojnë edhe të ardhmen e sektorit, ndërkohë që një pjesë e tokës bujqësore mbetet e pashfrytëzuar.
Burim: Klan Kosova
— Redaksia ZHURMA