SMS mashtruese në emër të Postës dhe DPSHTRR

Qytetarët në Shqipëri po përballen me një formë mashtrimi online përmes mesazheve SMS që pretendojnë se dërgohen nga Posta Shqiptare dhe Drejtoria e Përgjithshme e Shërbimeve të Transportit Rrugor. Këto mesazhe vijnë nga numra të huaj me prefiksin +212 të Marokut dhe përmbajnë lidhje të dyshimta, të cilat synojnë vjedhjen e të dhënave personale dhe financiare.

Në rastin e parë, dërguesi prezantohet si ekipi i shërbimit të Postës Shqiptare dhe njofton marrësin për një pako që nuk dorëzohet dot për shkak të adresës, duke kërkuar përditësimin e saj përmes një lidhjeje interneti bashkë me një kod marrjeje. Në rastin e dytë, përdoret emri i DPSHTRR-së për të pretenduar se automjeti është përfshirë në një shkelje të rregullave të qarkullimit, ku marrësi udhëzohet të hyjë në një faqe që imiton komunikimin zyrtar duke vendosur numrin e targës. Përdorimi i domeneve të dyshimta si yucpyo.cfd dhe i gjuhës që krijon urgjencë shërbejnë si sinjale paralajmëruese për sulme kibernetike.

Ekspertët e sigurisë kibernetike dhe vetë institucionet rekomandojnë që qytetarët të mos klikojnë në lidhje nga numra të panjohur, të mos japin të dhëna bankare apo fjalëkalime dhe të verifikojnë çdo njoftim përmes kanaleve zyrtare. Posta Shqiptare thekson se mesazhet e tilla nuk janë dërguar nga ajo, ndërsa qytetarët që kanë rënë pre e skemës këshillohen të kontaktojnë menjëherë bankën për bllokimin e kartave.