Çfarë solli Sinan Vllasaliu në Prishtina Gastronomy Festival?

— Prishtina Gastronomy Festival vazhdoi mbrëmë me një tjetër natë të mbushur me muzikë dhe atmosferë festive, ku protagonisti i mbrëmjes ishte këngëtari i mirënjohur Sinan Vllasaliu. Në sheshin “Adem Jashari”, qindra qytetarë dhe vizitorë u mblodhën për të shijuar koncertin e artistit, duke e shndërruar edhe natën e tretë të festivalit në një festë të madhe të muzikës dhe gastronomisë, shkruan KultPlus.

Sinan Vllasaliu solli në skenë një repertor që ndër vite është bërë pjesë e kujtesës muzikore të publikut shqiptar. Interpretimet e tij u shoqëruan nga zëra të shumtë që këndonin bashkë me artistin, ndërsa atmosfera u bë edhe më e veçantë nga energjia që mbizotëroi gjatë gjithë koncertit.

Gjatë mbrëmjes, Sinan Vllasaliu interpretoi disa prej këngëve të tij më të njohura, ndër to “Sonte ti po bëhesh nuse”, “Sa shumë vite”, “Ti më je si një pikë loti”, “Tani fotografia” dhe “Magdalena”, si dhe hite të tjera që u pritën me entuziazëm nga publiku. Refrenet e këngëve u kënduan njëzëri nga të pranishmit, ndërsa shumë prej tyre vallëzuan gjatë gjithë koncertit.

Atmosfera në sheshin “Adem Jashari” ishte e gjallë nga fillimi deri në fund të mbrëmjes. Familje, të rinj e vizitorë të shumtë u bënë pjesë e festës, duke shijuar njëkohësisht muzikën, vallet spontane dhe ofertën gastronomike që vazhdon të jetë një nga atraksionet kryesore të festivalit.

Përveç programit artistik, vizitorët patën mundësi të provojnë gatime tradicionale shqiptare, specialitete nga kuzhina të ndryshme ndërkombëtare dhe degustime të verërave, duke përjetuar konceptin që e karakterizon festivalin – bashkimin e shijeve, kulturës dhe argëtimit në një hapësirë të përbashkët. Prishtina Gastronomy Festival do të vazhdojë edhe në dy netët e fundit të këtij edicioni.

Më 18 korrik publiku do të argëtohet me këngëtarin Bujar Qamili, ndërsa festivali do të përmbyllet më 19 korrik me koncertin e këngëtares Klea Çutra. Me moton “Bukë e Kripë e Zemërbardhë”, festivali vazhdon të mbledhë çdo mbrëmje një numër të madh artdashësish dhe adhuruesish të gastronomisë, duke e kthyer qendrën e Prishtinës në një hapësirë ku muzika, tradita dhe kulinaria ndërthuren në një atmosferë të veçantë verore.

Burim: KultPlus, https://kultplus.com/sinan-vllasaliu-solli-nje-mbremje-plot-ritem-dhe-nostalgji-ne-prishtina-gastronomy-festival/
— Redaksia ZHURMA