11 masa sigurie për këmbim valutor pa licencë në Berat

— Policia e Beratit ka ekzekutuar 11 masa sigurie ndaj personave të dyshuar për ushtrimin e aktivitetit të këmbimit valutor pa licencë. Operacioni u zhvillua nga Seksioni për Hetimin e Krimeve Ekonomiko-Financiare, nën drejtimin e Prokurorisë së Beratit, sipas lajmit të vizionplus.tv.

Katër persona janë vendosur në masën e sigurisë “arrest në shtëpi”, ndërsa për shtatë të tjerë është caktuar “detyrim për t’u paraqitur në Policinë Gjyqësore”, si dhe “ndalim i daljes jashtë shtetit”.

Gjatë hetimeve ka rezultuar se në 6 subjekte për transferta parash, të vendosura në Berat, Kuçovë, Skrapar dhe Dimal, të cilat administroheshin dhe kishin të punësuar këta shtetas, kryhej këmbim valutor pa qenë të pajisur me licencën e nevojshme sipas ligjit. Nga kontrolllet në këto subjekte, u gjetën dhe u sekuestruan me cilësinë e provës materiale: 8 808 000 lekë, 118 425 euro, 7 390 dollarë amerikanë, 665 paund, 110 franga zvicerane, 12 telefona celularë, 4 pajisje DVR, 2 USB dhe një laptop.

Materialet procedurale iu referuan Prokurorisë së Beratit, për veprime të mëtejshme, për veprën penale “Ushtrimi pa licencë i veprimtarive financiare”, njofton policia.

Burim: Ekonomia Online, https://ekonomiaonline.com/berat-11-masa-sigurie-per-kembim-valutor-pa-licence-sekuestrohen-mbi-118-mije-euro/ — Redaksia ZHURMA