Pse fiton Shkëndija kundër Europa FC?

— Shkëndija e ka nisur në mënyrën më të mirë rrugëtimin në garat evropiane, duke triumfuar me rezultat bindës 5-0 në transfertë ndaj Europa FC. Skuadra tetovare ishte dukshëm superiore gjatë gjithë takimit, duke kontrolluar lojën nga minuta e parë dhe duke hedhur një hap të rëndësishëm drejt kualifikimit në fazën e ardhshme. Golin e parë për kuqezinjtë e realizoi Fahd Ndzengue në minutën e 28-të, pasi u asistua mjaft mirë nga Endrit Krasniqi.

Pjesa e parë u mbyll me epërsinë minimale 1-0 në favor të Shkëndijës, ndërsa në fraksionin e dytë të lojës ekipi tetovar tregoi edhe më shumë efikasitet. Fabrice Tamba ishte protagonist me dy gola, të shënuar në minutat 52 dhe 75, duke e çuar rezultatin në një avantazh të rehatshëm. Edhe Almir Kryeziu debutoi me gol në ndeshjen e tij të parë zyrtare, duke realizuar për 4-0 në minutën e 83-të.

Pikën e fundit fitores së thellë ia vendosi Besar Ibrahimi, i cili shënoi golin e pestë të takimit. Sa i përket futbollistëve kosovarë, Endrit Krasniqi dhe Drilon Islami e nisën sfidën si titullarë, ndërsa Almir Kryeziu u inkuadrua në pjesën e dytë dhe arriti të regjistrohej edhe në listën e golashënuesve.

Burim: TV21, https://tv21.tv/shkendija-shkaterron-europa-fc-me-manita-nje-hap-larg-raundit-te-ardhshem/ — Redaksia ZHURMA