Sa u rrit tregtia e kokainës në Shqipëri gjatë 2025?

TIRANË — Tregtimi i kokainës në Shqipëri ka shënuar një rritje prej 27.6% gjatë vitit 2025, sipas Strategjisë Kombëtare për Parandalimin dhe Luftën kundër Krimit të Organizuar 2026–2030. Dokumenti e cilëson kokainën si një nga kërcënimet më serioze për sigurinë dhe ekonominë e vendit. Rrjetet kriminale po përdorin metoda gjithnjë e më të sofistikuara për trafikimin e drogës.

Rastet e zbuluara janë shtuar, por sasia e kokainës së sekuestruar ka rënë — një zhvillim që tregon se grupet kriminale po përshtatin mënyrat e transportit dhe fshehjes për t'iu shmangur goditjeve të autoriteteve. Sipas dokumentit, rreth 58% e grupeve të krimit të organizuar gjatë viteve 2024-2025 kanë qenë të përfshira në aktivitete të lidhura me narkotikët.

Fitimet nga tregtimi i narkotikëve investohen në sektorë të ekonomisë — ndërtim dhe turizëm — përmes pastrimit të parave. Dokumenti paralajmëron se këto investime të paligjshme shtrembërojnë konkurrencën, ndikojnë në tregun e pasurive të paluajtshme dhe rrisin rrezikun e korrupsionit në këta sektore.

Përballë kësaj, qeveria parashikon një qasje hetimore më të gjerë, duke u fokusuar në organizatorët, financuesit dhe rrjetet logjistike të krimit. Strategjia parashikon përdorimin e teknologjive të mbikëqyrjes, dronëve dhe skanerëve, dhe forcimin e bashkëpunimit mes SPAK-ut, Policisë dhe partnerëve ndërkombëtarë, me një fond të parashikuar prej 1.66 miliardë lekësh për periudhën 2026-2030.

Burim: Report Tv
— Redaksia ZHURMA