Pse analistët e shohin rikthimin e Osmanit në LDK si 'bashkëpunim halli'?

PRISHTINË — Kryetari i Lidhjes Demokratike të Kosovës Lumir Abdixhiku deklaroi pas mbledhjes së sotme të kryesisë se Vjosa Osmani do të jetë "një kandidate e shkëlqyer për presidente", ndërsa vetë do të jetë "kandidat për kryeministër" — konfirmim i koalicionit para zgjedhjeve të parakohshme të 7 qershorit.

Analistja Fatime Hajdari e cilësoi bashkëpunimin Abdixhiku–Osmani si "bashkëpunim halli". "Unë e shoh si një bashkëpunim halli për të mirëmbajtur karrierat respektive. Zonja Osmani tashmë është pa një grupim politik, ajo ka ambicie politike, fakti që i është rikthyer politikës, ka qenë e pritshme që rrugëtimi i saj politik do të vazhdojë me Lidhjen Demokratike të Kosovës", tha Hajdari.

Hajdari vërejti gjithashtu se "ajo që është jo shumë e pritshme është zbrapsja e kandidatit për kryeministër zotit Abdixhiku për t'i prirë listës". Ajo shtoi se marrja e Osmanit "bëhet për interes të disa akterëve aty sepse kanë parë që tashmë ata nuk kanë fuqi politike për t'u ballafaquar me Kurtin".

Analisti Sadik Zeqiri e cilësoi rikthimin si të pritshëm, por jo si bashkim të ri politik. "E pritshme ka qenë sepse është folur qysh moti që në raportet mes ish-presidentes dhe kryeministrit patën filluar të ftohen", tha ai, duke shtuar: "Unë nuk e quaj një bashkim të madh sepse ajo ka qenë në Lidhjen Demokratike. Është një rikthim i saj në Lidhjen Demokratike, në partinë të cilën e ka dëmtuar më së shumti vet ajo".

Analisti Ejup Gojnovci tha se LDK ka bërë "një lojë jo të ndershme me zonjën Osmani duke e përmendur emrin e saj publikisht, por pa e lakuar asnjëherë si kandidate të propozuar". As ato 15 nënshkrime të dërguara nga Abdixhiku, sipas tij, "nuk ishin nënshkrime për zonjën Osmani". Sipas Gojnovcit, rikthimi është i domosdoshëm për të dyja palët.

Burim: Zeri
— Redaksia ZHURMA