ARBK bllokon shkarkimet pas akuzave se ekspozoi letërnjoftimet
Janë publikuar nënshkrime dhe dokument identifikimi, mund të krijojnë rrezik për vjedhje ose imitimin e identitetit
PRISHTINË — Një qytetar ka ngritur shqetësime publike lidhur me mënyrën se si Agjencia për Regjistrimin e Bizneseve të Kosovës ka trajtuar të dhënat personale të qytetarëve, duke pretenduar se në dokumentet e publikuara kanë qenë të ekspozuara informacione të ndjeshme. Përmes një postimi në rrjetet sociale, ai ka thënë se, ndonëse ARBK ka deklaruar publikisht se ka publikuar vetëm të dhënat e lejuara me ligj dhe ka mohuar ekspozimin e informacioneve që nuk duhej të bëheshin publike, më pas ka bllokuar mundësinë e shkarkimit të dokumenteve.
Sipas tij, në një dokument kanë qenë të dukshme nënshkrimet e themeluesve, si dhe të dhënat e plota të letërnjoftimit të një përfaqësuesi ligjor, përfshirë numrin e dokumentit, datën e lëshimit dhe adresën. Qytetari pretendon se publikimi i këtyre të dhënave mund të krijojë rrezik për vjedhje ose imitimin e identitetit, mashtrime financiare, falsifikim dokumentesh dhe forma të tjera të mashtrimeve online.
Qytetari thotë se pasojat e mundshme të ekspozimit të këtyre të dhënave mund të bëhen të dukshme vetëm me kalimin e kohës, duke e cilësuar rastin si një çështje serioze. Burim: Lajmi.net, https://lajmi.net/qytetari-akuzon-arbk-ne-per-ekspozim-te-te-dhenave-personale-jane-publikuar-nenshkrime-dhe-dokument-identifikimi/
— Redaksia ZHURMA