Pse OJQ-të po e kundërshtojnë Ligjin e ri për lojërat e fatit?

SHKUP — Organizatat e shoqërisë civile në Maqedoninë e Veriut kanë kërkuar zyrtarisht që të mos miratohet Propozim-ligji i ri për lojërat e fatit dhe lojërat argëtuese. Gjatë debatit publik në Kuvend, ato shprehën shqetësimin se projektligji i fshin OJQ-të si përfituese të drejtpërdrejta.

Ndryshimet e propozuara rrezikojnë të lënë pa mbështetje organizatat e personave me aftësi të kufizuara dhe Kryqin e Kuq. Sektori civil paralajmëron se heqja e këtyre garancive do të sjellë shpërndarjen e fondeve pa kritere të qarta, pa transparencë dhe pa asnjë garanci se ato do të arrijnë te kategoritë e cenueshme.

Përfaqësuesja e Lidhjes për Mbrojtje nga Diskriminimi, Maja Atanasova, theksoi se fshirja e OJQ-ve nga ligji do të dëmtojë rëndë besueshmërinë e financimit. Ajo kërkoi që sektori civil të vazhdojë të njihet si përfitues për të mos ndërprerë shërbimet e licencuara që u ofrohen qytetarëve që kanë nevojë.

Valentina Veliçkovska nga Rrjeti Kombëtar Kundër Dhunës ndaj Grave kritikoi ashpër procesin, duke theksuar se propozimi nuk u hodh fare për konsultim në sistemin ENER. Ajo kërkoi që organizatat të njihen qartë si përfituese të drejtpërdrejta përmes Nenit 18, në mënyrë që të mos u hiqen mjetet ekzistuese.

Ndërsa Ana Avramovska paralajmëroi rrezikun e mbetjes pa mbështetje për grupet e margjinalizuara pas një dekade financimi, Suaret Alishinov nga koalicioni "Menuvame" kërkoi kthimin e ligjit në fazën paraprake. Ai propozoi krijimin e një komisioni të ri gjithëpërfshirës për të shmangur pakënaqësitë e sektorit civil.

Gjatë debatit pati reagime të ashpra edhe nga përfaqësuesit e industrisë së lojërave të fatit dhe të punësuarit në këtë sektor. Ata paralajmëruan humbje të vendeve të punës, rritje të ekonomisë gri dhe aktiviteteve ilegale, duke kërkuar tërheqjen e propozimit dhe përfshirjen e tyre në hartim.

Në fund, sekretarja shtetërore në Ministrinë e Financave, Andriana Maltlikoska, deklaroi se institucionet do t'i shqyrtojnë me kujdes vërejtjet për Nenin 18. Ky projektligj, i cili fillimisht u dorëzua në Kuvend më 7 gusht 2025, ka ngjallur debate të forta dhe ende po zvarritet nëpër komisionet parlamentare.

Burim: Portalb
— Redaksia ZHURMA