Porsche prej 99 mijë frangash: Pse u bllokua në kufirin gjerman?
Autoritetet gjermane kanë sekuestruar automjetin luksoz që po transportohej nga Zvicra drejt Nordrhein-Westfalenit, për shkak të shmangies së doganës.
GEISINGEN — Autoritetet doganore gjermane kanë sekuestruar një veturë luksoze të tipit Porsche me vlerë rreth 99 mijë franga zvicerane (rreth 108 mijë euro). Automjeti po transportohej me një rimorkio të mbyllur nga Zvicra drejt Gjermanisë, kur u ndalua për një kontroll rutinë në autostradën A81 pranë Geisingenit.
Gjatë kontrollit të kryer nga zyrtarët e doganës së Singenit, shoferi deklaroi se po e transportonte automjetin sportiv në emër të pronarit. Megjithatë, ai nuk posedonte asnjë dokumentacion të rregullt që vërtetonte se makina ishte importuar dhe zhdoganuar sipas rregullave në fuqi.
Për shkak të mungesës së plotë të dokumenteve doganore, autoritetet gjermane nisën menjëherë procedurat ligjore për këtë rast. Doganierët llogaritën detyrimet e importit në vlerë prej rreth 33.400 eurosh, të cilat duhet të paguhen përpara se automjeti të mund të vazhdojë rrugëtimin e tij drejt landit të Nordrhein-Westfalenit.
Si masë sigurie, makina Porsche do të qëndrojë e konfiskuar deri në sqarimin e plotë të statusit të saj doganor dhe shlyerjes së detyrimeve financiare. Ky sekuestrim është pjesë e kontrolleve të rregullta doganore dhe fiskale që autoritetet gjermane kryejnë përgjatë zonës kufitare me Zvicrën.
Burim: Albinfo.ch
— Redaksia ZHURMA