Si po shkon numërimi i mbi 85 mijë votave me postë dhe atyre me kusht?

PRISHTINË — Komisioni Qendror i Zgjedhjeve ka hyrë në fazën e fundit të numërimit të fletëvotimeve për zgjedhjet parlamentare të 7 qershorit. Zëdhënësi i KQZ-së, Valmir Elezi, bëri të ditur se tashmë është përmbyllur procesi i numërimit të votave të dërguara nga përfaqësitë diplomatike, ku më 6 qershor votuan rreth 23 mijë shtetas.

Gjatë ditës së shtunë pritet të përfundojë edhe numërimi i fletëvotimeve në Qendrën Komunale të Prishtinës. Ky hap shënon përfundimin zyrtar të verifikimit të rezultateve për subjektet politike dhe votave për kandidatë në të 38 komunat e Kosovës, të cilat vijnë nga vendvotimet e rregullta.

Pas kësaj, vëmendja e KQZ-së zhvendoset plotësisht te fletëvotimet e mbetura. Bëhet fjalë për votat e dërguara përmes postës në 23 kutitë postare, votat me kusht në 52 vendvotime, si dhe votat e personave me nevoja të veçanta. Numërimi i votave me postë ka filluar të premten mbrëma.

Nga kutitë postare janë tërhequr gjithsej mbi 85,700 pako të supozuara me fletëvotime. Deri të premten në mbrëmje, shërbimi votues ka vlerësuar më shumë se 60,000 pako. Prej tyre, KQZ-ja ka aprovuar 59,973 pako që konsiderohen të vlefshme, ndërsa 2,244 pako të tjera janë refuzuar.

Arsyeja kryesore e refuzimit në 2,066 raste ishte mungesa e dëftesës së regjistrimit me të dhëna unike. Paralelisht, KQZ-ja po përgatitet për votat me kusht ku janë evidentuar 8,751 votues në 52 vendvotime, si dhe për 3,144 votues të regjistruar për të votuar përmes ekipeve mobile.

Para se të fillojë numërimi i këtyre votave, po bëhet skanimi i listës së votuesve nga vendvotimet e rregullta. Ky proces synon të krahasojë të dhënat dhe të parandalojë votimin e dyfishtë. Vetëm pas këtij verifikimi teknik do të mund të shpallen rezultatet përfundimtare të zgjedhjeve parlamentare.

Burim: Telegrafi, https://telegrafi.com/kqz-ne-fazen-e-fundit-te-numerimit-mbeten-te-numerohen-votat-me-poste-dhe-ato-me-kusht/
— Redaksia ZHURMA