Nis Kupa e Botës U15 në Azerbajxhan ku Kosova mund të luajë ndaj Serbisë

Kupa e re e Botës FIFA U15 nis të enjten në Baku të Azerbajxhanit, me pjesëmarrjen e 189 ekipeve kombëtare të të rinjve, ku bën pjesë edhe Kosova që mund të përballet me Serbinë. Turneu zhvillohet për herë të parë në këtë format, zgjat nëntë ditë dhe përfshin afro 1.000 ndeshje në 20 fusha.

Format i ri organizohet me lojtarë të lindur në vitin 2011, ku secila skuadër ka 14 futbollistë dhe ndeshjet luhen me nga tetë lojtarë në fusha të vogla. Garat fillojnë me ndarjen e ekipeve në 32 grupe, ndërsa rezultatet e fazës së parë përcaktojnë kalimin e tyre në gjashtë nivele në raundin e dytë, me secilin nivel që do të shpallë fituesin e vet të veçantë. Përfaqësuesja e Kosovës U15, e udhëhequr nga përzgjedhësi Ilir Nallbani, është nisur drejt Azerbajxhanit pas pjesëmarrjes së fundit në një turne zhvillimor të UEFA-s në Bullgari, megjithëse nuk ka pasur ndonjë njoftim zyrtar nga Federata e Futbollit e Kosovës për këtë ngjarje.

FIFA ka sqaruar se çiftet e fazës eliminatore pas grupeve do të përcaktohen vetëm mbi bazën e rezultateve të raundit të parë, pa vendosur kufizime të posaçme politike për kundërshtarët, siç njoftoi mediumi gjerman Sportschau. Kjo rregullore krijon mundësinë teorike për një ndeshje mes Kosovës dhe Serbisë, dy përfaqësuese që nuk lejohen të luajnë kundër njëra-tjetrës në kompeticionet e UEFA-s. Deri më tani nuk është caktuar asnjë duel mes tyre. Skenarë të ngjashëm të mundshëm përfshijnë përballjet mes Izraelit dhe Palestinës, Iranit dhe Izraelit, si dhe Spanjës me Gjibraltarin, ndonëse qeveria iraniane ua ndalon sportistëve të vet të garojnë ndaj izraelitëve. Në këtë turne nuk merr pjesë Armenia për shkak të konfliktit me vendin pritës.

Në këtë aktivitet merr pjesë edhe Rusia, e cila kishte marrë ftesë në dhjetorin e kaluar së bashku me të gjitha 211 federatat anëtare të organizatës botërore, duke shënuar rikthimin e saj të parë në një garë globale futbolli që nga nisja e luftës kundër Ukrainës. Federata Ukrainase e Futbollit i tha mediumit gjerman se ishte tërhequr nga turneu për arsye sportive përpara se të mësonte për praninë e Rusisë, ndërsa pas njoftimit të federatave të tjera, disa shtete zgjodhën të tërhiqeshin dhe të tjera refuzuan të luanin ndaj ekipit rus. Nga pjesëmarrja ka hequr dorë edhe Federata Gjermane e Futbollit, e cila deklaroi se talentet e reja nuk duhet të ekspozohen shumë herët ndaj presionit të rezultateve, vlerësimit publik dhe agjentëve.

Sipas mediumit gjerman, organizatat për të drejtat e njeriut kanë kritikuar vazhdimisht autoritetet në Baku për përdorimin e ngjarjeve të mëdha sportive me qëllim rritjen e profilit ndërtkombëtar të vendit. Nga ana tjetër, FIFA njoftoi se qyteti pritës u zgjodh për shkak të infrastrukturës sportive të klasit të parë, ndërsa një turne i ngjashëm për vajza është planifikuar të organizohet në vitin 2027.

Drejtori i zhvillimit global të futbollit në FIFA, Arsène Wenger, e ka vlerësuar organizimin në një video zyrtare. «Kjo është bukuria e këtij turneu. Ishte një ëndërr të kishim të gjithë nga e gjithë bota së bashku. Në FIFA, ne gjithmonë themi se futbolli bashkon botën», deklaroi Wenger. Ndërkaq, presidenti i FIFA-s, Gianni Infantino, shkroi në Instagram se presidenti i Azerbajxhanit e kupton rolin e futbollit për bashkimin e komuniteteve, ndërsa më herët në shkurt kishte deklaruar për Rusinë: «Sa më shpejt që të gjithë të përfshihen në një Kupë Bote, aq më mirë».