Nafta në Shqipëri, kostoja reale më e larta në Europë ndaj fuqisë blerëse

Çmimi i një litri naftë në Shqipëri ka arritur në 229 lekë, ose 2.46 euro, duke e vendosur vendin të tretin në Europë. Vetëm Danimarka, me 2.60 euro për litër, dhe Norvegjia, me 2.56 euro, kanë çmime më të larta. Mesatarja europiane e vendeve të përfshira në krahasim është rreth 1.94 euro për litër.

Në rajon, Serbia shënon gati 2 euro për litër, Mali i Zi 1.87 euro, Kosova 1.85 euro, Bosnjë-Hercegovina 1.76 euro, ndërsa Maqedonia e Veriut është më e lira me 1.64 euro.

Megjithatë, çmimi në pompë nuk është treguesi i vetëm. Kur vihet përballë të ardhurave, kostoja për konsumatorin shqiptar është dukshëm më e lartë. Sipas krahasimit të çmimeve të naftës të publikuara nga Global Petrol Prices me të ardhurat për frymë të FMN-së për vitin 2026, të matura sipas fuqisë blerëse, një litër naftë në Shqipëri përfaqëson 3.56% të të ardhurave ditore për frymë, më e larta në Europë.

Të ardhurat për frymë sipas fuqisë blerëse në Shqipëri janë rreth 25.2 mijë dollarë ndërkombëtarë në vit, ose rreth 69.2 dollarë në ditë. Për një shqiptar, një danez apo një norvegjez, pesha e një litri naftë prej 2.46 eurosh është krejt e ndryshme për shkak të diferencave në të ardhura.

Burimet: JavaNews; BoldNews; BalkanWeb; Almakos; Bota Sot (klaster 6 outlets).